خلف خلاف....وعجبي

السلام عليكم ورحمة الله وبركاته

سؤال يلح على خاطري اليومين دول 

هو احنا باقينا ماشيين خلف خلاف ولا انا اللي متهيألي ؟!!

زمان وانا صغير ( مش من زمان قوي يعني ) والدي الله يرحمه ووالدتي ربنا يديها الصحة وطولة العمر ربونا على ان احنا ما نبصش للي في ايدين الناس 

وكانوا دايما يقولولنا في امور الدين بصوا دايما للاحسن منكم علشان همتكم تزيد وتحاولوا تزيدوا من رصيد اعمالكم وايمانكم يزيد

وفي امور الدنيا ما تبصووش للي اعلى منكم بصوا دايما للاقل منكم علشان تحسوا بنعمة ربنا عليكم وانكم احسن من غيركم كتير

زي ما قال الرسول صلى الله عليه وسلم " انظروا إلى من هو أسفل منكم ولا تنظروا إلى من هو فوقكم فهو أجدر أن لا تزدروا نعمة الله عليكم" متفق عليه .

ولما كبرت وبدأت اختلط بالناس اكتشفت ان قلة قليلة مندسة هم اللي بيطبقوا القاعدة دي 

اما الغالبية العظمى فبقت ماشية خلف خلاف 

لما تيجي تلفت نظرها لتقصير بدر منها في حق ربنا تلاقيها ترد عليك رد تلقائي ده انا احسن من غيري كتير 

فاصبح اللي بيصلي الفروض يكسل عن النوافل بحجة ان غيره مش بيحافظ على الصلاة 

واصبح اللي بيصلي فرض وبيسيب فرض حاسس انه كويس قوي علشان زمايلة ما بيصلوش اصلا 

واصبحت البنت المحجبة حجاب البادي والجينز والمكياج لديها حجة جاهزة سريعة تلقائية انا احسن من غيري روحي شوفي اللي مش محجبة اصلا 

لكن بئى لو تحدثنا في امور الدنيا فنجد كلمة اشمعنا هي الغالبة 

اشمعنا فلانة عندها وانا ما عنديش 

اشمعنا علان عنده وانا ما عنديش 

فلان اشتغل وجاب الشقة والعربية وبيبقض مبلغ وقدره وانا يا حسرة ما ليش غير كام ملطوش اللي بقبضهم من الحكومة كل اول شهر

والعجيبة بئى اني في حديثي مع احدى الاخوات الفاضلات لاقتها بتقول في وسط الكلام والله يا اختي لما بقعد مع الستات بحس انهم مرتاحين مع ازواجهم وانا زوجي والله راجل فاضل ومحترم ومهتم ببيته واسرته  بس احيانا بيدقق على حاجات 

وكأن الرجالة كلهم مهما كانوا كويسين ما بيجوش عند حاجات معينة ويتربسوا كل حسب شخصيته 

ومش الرجالة وبس ده الجنس البشري عموما لازم تلاقيه بيتربس في امور بتختلف حسب شخصية وتربية كل فرد .

يعني من الاخر اصبح من الطبيعي جدا انك تكون قنوع وراضي بقليله مادام الموضوع متعلق بالاخرة وبعلاقتك بربنا وكنتيجة طبيعية تصبح اعمالك في النازل وايمانياتك مع مرور الوقت في الحضيض الا من رحم ربي

وتصاب بحالة من الفجع والطمع وعدم الرضا عندما يتعلق الامر بالدنيا وكنتيجة طبيعية تصاب بمرض الحقد والحسد 

اتذكر كلمة للشيخ علي القرني في شريطه علمتني الحياة 

"علمتني الحياة في ظل العقيدة: أن أنظر في أمور دنياي إلى من هو تحتي، فذلك جدير ألا أزدري نعمة الله علي. وأن أنظر في أمور آخرتي إلى من هو فوقي فأجتهد اجتهاده لعلي ألحق به وبالصالحين، فلا أحقد على أحد ما استطعت ولا أحسد أحداً ما استطعت. "

المشكلة الفظيعة المريعة ان العدوى بدأت تنتقلي 

في حالة الفوضى والتقصير اللي عمتني الفترة اللي فاتت من غير سبب كنت قاعدة الوم نفسي واحاسبها فاذا هي ترد علي الرد المشهور 

ده انتي احسن من غيرك 

غيرك مش في باله اصلا 

ربنا يستر وما بدأش امشي خلف خلاف انا كمان 

نسأل الله العفو والعافية .

*************************

ملحوظة مالهاش دعوة بالموضوع 

كنت بحاول اجري تعديلات على المدونة فلاقيت شكلها بايخ ومش لايق خالص على القالب فجاري تغييره ولكن بما اني ما بعرفش اتخيل القالب غير لما اركبه على المدونة واشوف بعيني فهتلاقوا المدونة متقلبة وكل يوم بشكل لحد ما اثبت على قالب

معلشي بئى استحملوني واصبروا عليا

دمتم بود

تحياتي