الثلاثاء، 27 يناير 2009

الليلة الاولى

السلام عليكم ورحمة الله وبركاته 

بجد مش عارفة اقول ايه ؟!!

ولا ابدا الحكاية منين 

حكاية بنت في عمر الزهور 

وبما اني معرفش بداية الحكاية ايه؟

ولا بدات امتى ؟

وازاي ؟

هبدا من اللحظة اللي عرفتها فيها 

بالرغم من انها بنت عمي والبيت في وش البيت 

الا اني فعليا ماعرفتهاش الا من 3 اربع سنين بس 

ايه السبب معرفش 

جايز علشان الغربة 

اصل والدي الله يرحمه كان مسافر السعودية وانا اتولدت هناك وكان بالنسبة لي مصر واهل مصر اجازة سريعة للفسحة والتسلية

وفضل الحال على كده لمدة 13 سنة

13 سنة عارفة اهلي اللي في مصر ومش عرفاهم
بشوفهم شهر في السنة وطبعا الشهر ده كان بيتقسم على اهل والدي واهل والدتي اللي في بلدتين مختلفتين 

وبالتالي ماكانش في فرصة للاحتكاك كانت كلها زيارات سريعة قبل ما نشد الرحال ونرجع السعودية 

ورجعنا لمصر وبدات علاقتي باهلي تزداد وبدات اعرفهم واتعامل معاهم واحبهم 

واكتشفت ازاي ان الغربة على قد ما بتدي على قد ما بتاخد 

وكان بيتها اخر بيت بدات اعرفه بجد

بدات ادخل فيه واعيش معاهم حياتهم 

افراحهم ومشاكلهم 

وهناك عرفتها 

كانت في كلية الطيب اول سنة او تاني سنة مش فاكرة بالضبط 

بس اللي فاكراه اني حسيت انها اتغيرت 

صحيح انا ماكنتش اعرفها قوي بس كان التغيير ملموس 

طريقة لبسها في كلامها حتى نظرتها كانت مختلفة 

وعرفت منها انها كانت بتدور على الطريق ولاقته خلاص

واختارته 

ولما سالتها عنه 

ردت ببساطة طريق ربنا 

ومن ساعتها 

بدات اتعلق بيها وحبتها وصاحبتها 

وراقبتها 

ايوه كنت براقبها وانا مبسوطة ومستغربة في نفس الوقت 

اتحولت لشعلة نشاط 

من مسجد لمسجد ومن درس لدرس واهتمت بدراستها اكتر واكتر 

كانت عاملة زي العطشان اللي لاقة المية وعمال بيشرب وبيشرب علشان يرتوي

ومهما شرب ما بيشبعش

وكأن همتها أبت الا ان تعلو وتعلو وترتقي 

وعندما نشرت الصور المسيئة عن الرسول صلى الله عليه وسلم 

اكيد كلنا تأثرنا وحزنا

لكن هي 

كان تأثرها مختلف وكان حزنها مختلف 

انتفضت وقالت الا رسول الله 

واصبح هذا الاسم اسم الاسرة الي انشأتها وكانت امينتها في الكلية بتاعتها 

جاتلي ساعتها وطلبت نصيحتي بحكم اني كان ليا انشطة كتير في كليتي 

وحاولت اساعدها على قد ما اقدر واخفيت عنها 

اخفيت عنها ان كل محاوالاتي مع الاسر اللي شاركت فيها باءت بالفشل ومالاقتش الصدى الي كنت اتمناه الى ان يئست وتركت كل تلك الانشطة 

وفضلنا على اتصال 

وقامت الاسرة 

وسبحان الله لاقيت صدى جامد جدا 

والتف حواليها طالبات كتير 

ماشفتش في حياتي الجامعية اسرة بدات وانتشرت وانتجت في وقت قصير جدا 

زي اسرتها 

واستمرت الاسرة بهذا الاسم الى ان طلب الاعضاء بالاجماع تغير اسمها علشان ياخدوا حريتهم في الانشطة شوية دون مضاياقات

واختاروا اسم 

جدد حياتك 

او على الاقل ده اخر اقتراح سمعته منها 

اتعلمت منها كتير 

اتعلمت منها ان ممكن قوي واحد يكون ملتزم ومتدين من زماااان ورصيده في خدمة الاسلام والمجتمع صفر

وممكن واحد يصحى في لحظة ويقول كفاية غفلة كفاية نوم 

ويلتزم جديد ويتجاوز رصيده الميئات بل الالوف وقد يكون الملايين في اياام

واتجوزت 

وسافرت مع زوجي السعودية 

وقل الاتصال نظرا لانشغالها الشديد بدراستها واسرتها 

والنهاردة 

اختي اتصلت علشان تبلغني الخبر

هديل نزلت الصبح علشان تروح الجامعة تحضر محاضرة 

عربية نقل دخلت في الميكروباص اللي كانت ركباه ونزل بيهم البحر 

عشر ة توفاهم الله 

واتنين كتبت لهم النجاة 

وكانت هديل ممن توافاهم الله 

ورحلت هديل

لو كنت شايف نفسك شباب والموت بعيد عنك 

رحلت هديل وهي بنت العشرين 

لو كنتي شايفة نفسك جميلة وعايزة تتمتعي بجمالك وراكنة حجابك على الرف او لابسة على الموضة 

رحلت هديل وواراها التراب

كم كانت جميلة 

لو بصيتي في وشها ما تقدريش تبعدي عينك عنها 

كان ليها وجه منير 

صانت جمالها بعفافها وحياءها وماتت بحجابها 

لو كنت فاكر ان الموت هيستأذنك ويدق على بابك 

ماتت هديل في لحظة 

رحلت في غمضة عين 

والليلة هي اول ليلة ليها في قبرها 

فلا تبخلوا بالدعاء


العزاء واجب لشقيقتها صاحبة مدونة الطبيبة الأديبة 

السبت، 10 يناير 2009

الفجوة

السلام عليكم ورحمة الله وبركاته
من كام يوم كنت قاعدة على النت بكلم اختي الصغيرة على السكاي
ولاقتها بعتالي رابط لصفحة في منتدى هي عضوة فيه منذ زمن واول مرة تشارك 
فتحت الرابط لاقيت الموضوع عبارة عن خواطر وهي مشاركة بالخاطرة دي
"ليت الفجوة بين ما أنوي فعله وما أفعله حقا تختفي..
حينها لا أعجب أن ملكني الله الدنيا ..
ولكني بليت بسوف..
فهل يرفع الله عني البلاء؟!"
لا تتخيلوا قد ايه الكلمتين البسيطتين دول اثروا فيا لانهم ببساطة مسوا وتر حساس عندي
فكروني اني اساس مشاكل كتيرة في حياتي ، وسبب تأخري في مجالات عديدة من الحياة سواء على المستوى الديني او الشخصي او الثقافي او او او 
يتلخص في كلمة واحدة 
سوف 
كلمة من ثلاث احرف فقط ولكنها مدمرة 
وسرحت بخيالي وتذكرت 
تذكرت آمال وطموحات وأهداف على مر الايام والسنين كنت ألقي باللوم على غيري أو على الظروف لحرماني منها وعدم تمكني من تحقيقها 
ولكن في حقيقة الواقع كنت أنا السبب 
نعم أنا السبب 
كم من فكرة نافعة انعم الله عليَ بأن هداني إليها ومع ذلك بددتها بكلمة سوف 
كم من أمنية سامية عجزت عن تحقيقها بكلمة سوف 
كم من واجبات ضيعتها والسبب سوف
كم أكره هذه الكلمة
فقد حرمتني الكثير
ومازالت.
حتى في ظل هذه الأحداث الدامية الأليمة التي ابتليت بها الأمة اجد هذه الكلمة تطاردني
سوف اجاهد بالدعاء 
سوف أفعل المقاطعة 
سوف اجاهد بالمال
سوف أعود الى منهج الله 
سوف .....وسوف .......وسوف ......
وتذكرت قول الله تعالى :"
{‏يا أيها الذين آمنوا لم تقولون ما لا تفعلون كبر مقتا عند الله أن تقولوا ما لا تفعلون‏}.
فاشتد حزني وألمي 
ووجدتني اردد
متى تزول الفجوة ؟!!
متى ؟؟؟؟؟؟