عدنا بعد غياب

السلام عليكم ورحمة الله وبركاته

مش قادرة أتخيل ان سنة بحالها مرت منذ اخر مرة دخلت فيها مدونتي

بجد فوجئت

اي نعم انا عارفة اني بعدت لفترة مش قليلة بس ما كنتش متخيلة ان سنة بحالها عدت وشوية ايام فكة كده

العمر بيجري يا جدعان

على فكرة وحشتوني جدا

السنة اللي فاتت كانت مهمة بالنسبة لي

ربنا اكرمني ببنوتة صغنتوتة عندها دلوقتي 6شهور وشوية فكة برده ههههههههههههههه

وبما انها البكرية زي ما بيقولوا واتولدت في الغربة وماكنش حد جنبي

احتست فيها انا وابوها اخر حوسة

وتحولت هذه المولودة البريئة من أول لحظة طلعت فيها للدنيا الى حقل تجارب بنتعلم فيه كل حاجة من الصفر

ما انا برده معذورة يا اخوانا

عمري ما شيلت طفل حديث الولادة قبل كده بس الحمد لله ربنا سترها وعدت على خير

ورجعت لمدونتي الحبيبة

وحشتيني يا مدونتي

ووحشتوني كلكم

كفاية كده بئى علشان الحق اخد لفة على مدوناتكم قبل ما البنت تصحى

سلام

خلف خلاف....وعجبي

السلام عليكم ورحمة الله وبركاته

سؤال يلح على خاطري اليومين دول 

هو احنا باقينا ماشيين خلف خلاف ولا انا اللي متهيألي ؟!!

زمان وانا صغير ( مش من زمان قوي يعني ) والدي الله يرحمه ووالدتي ربنا يديها الصحة وطولة العمر ربونا على ان احنا ما نبصش للي في ايدين الناس 

وكانوا دايما يقولولنا في امور الدين بصوا دايما للاحسن منكم علشان همتكم تزيد وتحاولوا تزيدوا من رصيد اعمالكم وايمانكم يزيد

وفي امور الدنيا ما تبصووش للي اعلى منكم بصوا دايما للاقل منكم علشان تحسوا بنعمة ربنا عليكم وانكم احسن من غيركم كتير

زي ما قال الرسول صلى الله عليه وسلم " انظروا إلى من هو أسفل منكم ولا تنظروا إلى من هو فوقكم فهو أجدر أن لا تزدروا نعمة الله عليكم" متفق عليه .

ولما كبرت وبدأت اختلط بالناس اكتشفت ان قلة قليلة مندسة هم اللي بيطبقوا القاعدة دي 

اما الغالبية العظمى فبقت ماشية خلف خلاف 

لما تيجي تلفت نظرها لتقصير بدر منها في حق ربنا تلاقيها ترد عليك رد تلقائي ده انا احسن من غيري كتير 

فاصبح اللي بيصلي الفروض يكسل عن النوافل بحجة ان غيره مش بيحافظ على الصلاة 

واصبح اللي بيصلي فرض وبيسيب فرض حاسس انه كويس قوي علشان زمايلة ما بيصلوش اصلا 

واصبحت البنت المحجبة حجاب البادي والجينز والمكياج لديها حجة جاهزة سريعة تلقائية انا احسن من غيري روحي شوفي اللي مش محجبة اصلا 

لكن بئى لو تحدثنا في امور الدنيا فنجد كلمة اشمعنا هي الغالبة 

اشمعنا فلانة عندها وانا ما عنديش 

اشمعنا علان عنده وانا ما عنديش 

فلان اشتغل وجاب الشقة والعربية وبيبقض مبلغ وقدره وانا يا حسرة ما ليش غير كام ملطوش اللي بقبضهم من الحكومة كل اول شهر

والعجيبة بئى اني في حديثي مع احدى الاخوات الفاضلات لاقتها بتقول في وسط الكلام والله يا اختي لما بقعد مع الستات بحس انهم مرتاحين مع ازواجهم وانا زوجي والله راجل فاضل ومحترم ومهتم ببيته واسرته  بس احيانا بيدقق على حاجات 

وكأن الرجالة كلهم مهما كانوا كويسين ما بيجوش عند حاجات معينة ويتربسوا كل حسب شخصيته 

ومش الرجالة وبس ده الجنس البشري عموما لازم تلاقيه بيتربس في امور بتختلف حسب شخصية وتربية كل فرد .

يعني من الاخر اصبح من الطبيعي جدا انك تكون قنوع وراضي بقليله مادام الموضوع متعلق بالاخرة وبعلاقتك بربنا وكنتيجة طبيعية تصبح اعمالك في النازل وايمانياتك مع مرور الوقت في الحضيض الا من رحم ربي

وتصاب بحالة من الفجع والطمع وعدم الرضا عندما يتعلق الامر بالدنيا وكنتيجة طبيعية تصاب بمرض الحقد والحسد 

اتذكر كلمة للشيخ علي القرني في شريطه علمتني الحياة 

"علمتني الحياة في ظل العقيدة: أن أنظر في أمور دنياي إلى من هو تحتي، فذلك جدير ألا أزدري نعمة الله علي. وأن أنظر في أمور آخرتي إلى من هو فوقي فأجتهد اجتهاده لعلي ألحق به وبالصالحين، فلا أحقد على أحد ما استطعت ولا أحسد أحداً ما استطعت. "

المشكلة الفظيعة المريعة ان العدوى بدأت تنتقلي 

في حالة الفوضى والتقصير اللي عمتني الفترة اللي فاتت من غير سبب كنت قاعدة الوم نفسي واحاسبها فاذا هي ترد علي الرد المشهور 

ده انتي احسن من غيرك 

غيرك مش في باله اصلا 

ربنا يستر وما بدأش امشي خلف خلاف انا كمان 

نسأل الله العفو والعافية .

*************************

ملحوظة مالهاش دعوة بالموضوع 

كنت بحاول اجري تعديلات على المدونة فلاقيت شكلها بايخ ومش لايق خالص على القالب فجاري تغييره ولكن بما اني ما بعرفش اتخيل القالب غير لما اركبه على المدونة واشوف بعيني فهتلاقوا المدونة متقلبة وكل يوم بشكل لحد ما اثبت على قالب

معلشي بئى استحملوني واصبروا عليا

دمتم بود

تحياتي

صفحة جديدة في مدونتي خير جليس

 السلام عليكم ورحمة الله 

بوست جديد في مدونتي خير جليس

رواية الرجل ذو اللحية السوداء

http://khairjalees.blogspot.com/

قناة فور شباب

السلام عليكم ورحمة الله وبركاته 

اليومين اللي فاتوا كان عندي سدة نفس تجاه النت وجهاز الاب توب عامة 

وكأن في حاجة بتقرصني كل ما اجي اقعد على الجهاز 

والى الآن اجهل السبب 

قد يكون حد حسدنا ( انا والجهاز ) على العلاقة القوية الوثيقة  التي تجمع بيننا 

او قد يكون دعاء ست الحبايب بأن يخلصني الله من إدمان هذا الشيء العجيب المسمى بالنت لكي اتفرغ لدراستي وحياتي الاجتماعية قد استجيب مؤخرا  ولكن بعد انتهاء الدراسة والزواج!!!!

وأما علاقتي بما يسمى بالتلفاز فهي على النقيض تماماا

علاقة هشة يشوبها الملل والزهق وعدم الاستمتاع حتى وان عرض عليه ما يستهويني من برامج فانا ابحث عن حلقاتها المحملة على الانترنت و اتابعها من خلال الشبكة العنكبوتية ضاربة بعرض الحائط فكرة متابعتها من خلال التلفاز !!!

ولكن نظرا لسدة النفس وتوتر العلاقات بيني وبين النت اتجهت الى التلفاز واغرتني فكرة اني استكشف اخر اخبار البرامج التلفازية ايه؟

وانا بقلب لفت نظري قناة لا ادري ان كانت جديدة ام لا وان كنت اظنها من القنوات الشبابية الحديثة ولكنها بلون مختلف اطلقت على نفسها اسم قناة فور شباب  واعتقد ان مديرها الدكتور علي العمري 

هي قناة انشادية تعرض اناشيد ذات طابع شبابي سلس وجميل لفرق انشادية اسلامية عربية وغير عربية 

وأكثر ما لفت نظري هو برنامجين يتم عرضهم على القناة لم أشاهد حلقة كاملة لاي منهما ولكن ما شاهدته مقتطفات اعجبتني جدا

البرنامج الأول : لو كان بيننا  للشاب المميز أحمد الشقيري

تسمعه وهو يقول " لا نريد ان نعود الف وربعمائة سنة للوراء لكي نعيش زمن الرسول صلى الله عليه وسلم ولكننا نرده هو ان يأتي صلى الله عليه وسلم  بيننا "

البرنامج فيه فقرة كاميرا خفيه يختبروا الناس في موقف معين ونرى ردت الفعل 

الحلقتين اللي شفتهم كانوا عن الامانة وعن اماطة الاذى عن الطريق 

في الاولى كان بيخلوا حد تبعهم يسقط محفظة في الطريق وكانها سقطت دون ان يشعر ويشوفوا رد فعل الشخص الي ماشي وراه هل هياخد المحفظة ولا لا ومعظم اللي في الحلقة على حد ما اذكر نجحوا في هذا الامتحان واهادوها لصاحبها وان لم يكونوا كلهم

وفي التانية حطوا اغصان شجر في منتصف الطريق منتظرين يشوفوا مين اللي هينزل من عربيته وهيشيلها وللاسف كانت النتيجة مخجلة جدا جدا فعلى مدار وقت طويل لم ينجح في الامتحان الا اثنين فقط 

البرنامج عجبني جدا ويستحق المشاهدة  

البرنامج الثاني : كتاب استوقفني للدكتور محمد العوضي

وهو برنامج ثقافي يستعرض في كل حلقة كتاب مميز من مكتبة الدكتور محمد العوضي يشرح نبذه عن الكتاب ومعلومات عنه في خمس دقائق

واجمل مافيه اسلوب الدكتور في العرض واختيارته المتنوعة في مجالات شتى فهو لا يركز على كتب في تخصص معين ديني مثلااو تاريخي 

بل يفتح لك افاق شتى في علوم ومجالات شتى ويحمسك باسلوبه الرائع في العرض على قراءة الكتاب كل ذلك في 5 دقائق فقط

برنامج جدير بالمتابعة 

بصراحة القناة ببرامجها عاجباني

وان كان هناك ماقد يراه البعض سلبية في القناة فهو الايقاع والموسيقى الملازمين لمعظم اناشيد القناة 

والآن جاري البحث عن حلقات البرامج التي حازت اعجابي على النت لان محاولة توطيد العلاقات بيني وبين التلفاز باءت بالفشل 

وعدت الى جهازي العزيز والى الشبكة العنكبوتية بكل دهاليزها ومتاهاتها