ربة بيت .... هي تهمة ولا ايه؟

السلام عليكم ورحمة الله وبركاته

قبل ما أبدأ أحب ألفت نظر كل من يقرأ المدونة أني لا أناقش مبدأ عمل المرأة فأنا لا أتكلم عن هذه القضية 
ولا بنشر هذا البوست علشان أشجع الستتات انها تقعد في بيوتها 


لكل واحدة فينا ظروفها وكل واحدة حرة في تدبير امور حياتها . كده تمام

نيجي بئى للموضوع

الموضوع وما فيه مجموعة من المواقف والكلمات اللي بيتكرر قدامي من زماااااااان قوي

وكلها ان دلت تدل على ان فئة كبيرة من الناس وخصوصا البنات فاكرين ان كون الست تبئى ربة بيت فده مرادف لكلمتين

خدامة : فهي موراهاش غير انها تطبخ وتغسل وتمسح زيها زي أي خدامة

سطحية : فهي واحدة فاضية ما وراهاش غير سيرة الناس ده غير انها ودعت الثقافة ،والصلة بينها وبين العالم الخارجي من احداث انقطعت خلاص

ممكن تتهموني بالمبالغة لكن بالفعل في ناس قابلتها كتير هي دي نظرتها لربة البيت

اتذكر عندما دخلت المدرسة الاعدادية لاول مرة وبدات التعارف مع زميلاتي في الصف وكان من بينهم بنت الطبيبة

والمعلمة والمهندسة و كان منهم ايضا من هي بنت لام كرست حياتها لتربية اولادها فلا تعمل ولكنها ربة بيت

فكنت بلاحظ ان بعض البنات بيتحرجوا جدا انهم يقولوا ان امهاتهم ربات بيوت غير عاملات حتى وان كن متعلمات وكمان

بلاقي كل فتاة بامها تفتخر فدي تفتخر بان امها طبيبة او مدرسة او او امام البنت اللي امها ما بتشتغلش

طبعا كلنا ساعتها كنا صغيرين وغالبا محدش فينا كان فاهم حاجة كنا مجرد صغار كل بنت بتحب انها تتميز على صاحبتها وكده يعني

ولما كبرنا شوية ودخلنا الثانوية (مرحلة الاحلام الوردية ) وبدات كل واحدة فينا تحلم بالمستقبل اللي نفسها فيه

وتحكي عن احلامها في المجموع اللي عايزة تجيبوه والكلية اللي عايزة تدخلها والمهنة اللي عايزة تمتهنها وعريس

الهنا اللي هيجي يا خدها بعربيته البيضا

كنت كل ما اجي اعبر عن حلمي الاقي هجوم شديد واتهامات باني انسانة مش طموحة ده غير ان صواميل مخي فكت وعايزة تتربط من جديد

وما كان حلمي الا اني أكون أسرة سوية في كل شيء سوية في إيمانها وفي أخلاقها تقوم بدورها السوي في إصلاح المجتمع المسلم أسرة قرآنية تكون نموذج ومثال يحتذى به في زمن أصاب الخلل والتفكك كثير من الأسر .

فكان الرد العفوي من زميلاتي يعني من الآخر عايزة تتجوزي وتقعدي في البيت

طيب ما كنتي تاخديها من قاصرها وتدخلي دبلوم صنايع هيقصر لك الطريق

وهو تتجوزي بدري وتقعدي في البيت تغسلي وتمسحي وتكنسي ولا أجدعها خدامة وبدون مرتب كمان

وكنت دائما بالنسبة لهم إنسانة بلاطموح ورجعية بعد الشيء انتمي لعصر سي السيد

ومضت مرحلة الثانوية العامة وجبت مجموع يأهلني إني ادخل أي كلية عايزها

وتبدأ الضغوطات لازم تدخلي طب

يا جماعة انا مش عايزة طب

بس مجموعك يدخلك طب وبعدين فرقت ايه صيدلة ( اللي عايزة ادخلها ) من طب فرقت سنة دراسة يا ستي اعصري على نفسك لمونة واعتبري السنة دي شر لابد منه علشان تبئي طبيبة قد الدنيا وهو على الاقل تستري عورات المسلمات ووو

ولما كنت اعترض واقو ل لهم ان الطبيبة محتاجة تكون انسانة قادرة على انها تبذل مجهود كبير في شغلها من غير ما يأثر ده على يتها وأنا لا اجد في نفسي هذه المقدرة

لكن صيدلة دراسة قيمة اقدر افيد بيها بيتي وفي نفس الوقت هتبئى شهادة في ايدي لو احتجت اني اشتغل في أي وقت هيبئى بالسهولة اني الاقي شغل

وبعدين انا رافضة فكرت اني اشتغل من غير ما اكون محتاجة وافضل اني اخلي وقتي كله لببيتي ولتربية اولادي

فاتهم مرة اخرى بعدم الطموح وباني مش عايزة اثبت ذاتي واني هفضل معتمدة على وجود راجل جنبي طول عمري

السؤال بئى

هي ربة المنزل ما تقدرش تثبت ذاتها في بيتها ؟

ما تقدرش تثبت ذاتها في تربية اولادها ؟

ما ينفعش يكون طموحها انها تكون مربية اجيال في بيتها ؟


التربية شيء مش سهل فمابلك بئى في ظل المغريات والمفسدات التي تحيط بنا من كل جانب

فبقت التربية محتاجة متابعة اكبر من الاهل ومجهود اكبر مش هيتوفر لو الاب والام الاتنين مشغولين عن ولادهم في الشغل والوظيفة والعمل وما الى ذلك

هستفيد بايه لو اشتغلت وحققت نفسي في شغلي وجاه ده على حساب زوجي وبيتي واولادي

ايه الجريمة في تفكيري ؟

انا لم افرض تفكيري على احد

ولم اطالب كل ست انها تقعد في البيت وتترك عملها بالعكس في مجالات كتير محتاجين وجود العاملات فيها وفي سيدات بتقدر توفق مابين شغلها وبيتها وناجحة في الاتنين

بس اعتقد ان برده ده ما يديش الحق لحد انه يتهمني بعدم الطموح و ينتقص من قدر ربة البيت ويتهمها بانها وظيفتها تنحصر في انها خدامة وبس

وليه بيتهموها بالسطحية هي ما ينفعش تكون مثقفة وصاحبة راي الا لو كانت بتشتغل

وبعدين يعني هي الست العاملة ما بتشتغلش في بتها ؟ مش هي برده بتطبخ وبتغسل وبتمسح ول أنا اللي بيتهيألي ؟

وبعد نقاشات ومجادلات دخلت الكلية اللي انا عايزاها

وبعد التخرج ربنا رزقني بالزوج الصالح واكرمني فيه قوي

وبدات رحلة تحقيق الذات في بيتي

ويكفيني ان في فترة بسيطة كسبت محبة ورضا اهل زوجي وبقوا بيعاملوني زي بنتهم واكتر

وكسبت حب ورضا زوجي اللي بيفخر بيا في كل حديث وقدام الناس

وبدات رحلة حفظ القرآن وحفظت اربعة اجزاء في فترة قصيرة

ده غير المكتبة اللي بحاول اعملها عشان استفيد منها في امور التربية وفي كل المجالات اللي هتساعدني في تحقيق حلمي

ادعولي ان حلمي يكتمل وربنا يرزقني بالذرية الصالحة ويعني وزوجي على تربيتهم تربية صحيحة سوية
قولوا يارب